Скупый
В Ужанской долинѣ, куды солнѣчко зазирать лем около полудня, освѣщаючи черчащы потокы и дрѣмлющы лѣсы, ишли два брата и их товариш.
Давно были они в дорозѣ, сѣм-там ставали коло кырницѣ, ѣли и оддыхали. Напивши ся студеной воды, они продовжали свое путешествие и вели бесѣду о том, як было на косьбѣ в угорскых ровнинах. Андрѣй быв барз довольный косьбов, бо там давали ѣсти много хлѣба и солонины, но Иван не мог привыкнути на ровнину, его тягли дому горы и потокы, без котрых он не мог жити. По тому разговор пойшов о домашных, о членах семейства, которых они уже мѣсяць як зохабили и о них нич не знають. Утѣшали ся нашы путешествующы лем тым, же на косьбѣ заробили тельо гроши, же могли прожити на них мѣсяць – два.
В тот раз они так заговорили ся, аж и забыли бы, же настав час обѣда, кебы не напомянув им за то жолудок. Они якраз подходили ку селу Волосянка, де намѣряли ся купити хлѣба, котрый бы послужив им вмѣсто обѣда. Пришедши в Волосянку, они увидѣли, же обѣдати им не сужено, бо всѣ бовты были закрыты, як то обычно бывать в субботу, а христианского бовта не было. Зажурили ся нашы путешественникы, бо село Б., куда они держали путь, было еще далеко. Но не руськый чоловѣк тот, кто не годен знести голод, студѣнь и жажду. Пожурили ся путникы и пошли дале.
В дорозѣ Андрѣй, у котрого болѣла нога, и зато ишов обутый, озвав ся: «Братинку, хотѣв бы ты заѣсти хлѣба?» Иван уже и руку протяг за хлѣбом и думав за то, якым добрым став ся его брат, же купив тайно хлѣба и тым захотѣв зробити им сурприз. Айбо не устиг он и слова повѣсти, як Андрѣй зась гварить: «Кедь бы-сь ѣв, та было дагде купити и нести так, як я несу!» Иван нич на то не повѣв, закурив пипку, обы утолити голод, и всѣ ишли дале. Прийшли они ку потоку, через который требало переходити. Иван и его товариш были босы и без всякой трудности полѣзли в воду, а Андрѣй мусѣв быв ззути ся. Иван увидѣв, як его брат мучить ся, знимаючи чижму и просив го не ззувати ся: «Я тя перенесу, братчику, не мучь ся, лем дай вперед бисагу перенесу, а пак тебе». Не чекаючи згоды, взяв Иван бисагу, перенюс через поток, пак вытяг нож и, не уважаючи на крикы брата, одрѣзав половку хлѣба, котрый найшов ся в бисазѣ, зохабив бисагу на другом березѣ, а брата на противном и пойшов з товаришом дале, смакуючи бѣлый хлѣб.
(Записано в Буковци)
Жерело: Русскій народный календарь на високосный год 1928.
Изданіе О-ва А. Духновича. Ужгород. Сс.195–196.